Notas de prensa

Emigración activa axudas a entidades e consorcios locais para favorecer a integración

A Secretaría Xeral de Emigración, coa fin de facilitar a incorporación e participación da poboación retornada e inmigrante nos distintos ámbitos da sociedade galega, contribuíndo á súa integración plena e a unha convivencia plural e diversa nunha sociedade multicultural, activou unha resolución de subvencións a concellos, mancomunidades de concellos e consorcios locais para a realización de programas destinados a favorecer os procesos de acollida destes colectivos en Galicia durante o ano 2007.

A asignación orzamentaria desta resolución, que saíra publicada en breve no DOG, é de 500.000 euros, e complementa unha inmediatamente anterior, da mesma cifra, que permitiu asinar convenios de colaboración cos concellos de A Coruña, Vigo, Ourense, Lugo, Santiago e Pontevedra para a posta en marcha de programas integrais de atención, orientación e asesoramento a emigrantes retornados e inmigrantes.

O liña de subvencións actuará sobre aquelas accións referidas a programas do eixe de acollida que terán por obxecto a realización de proxectos que faciliten o acceso e a integración dos emigrantes retornados e inmigrantes na sociedade galega a través da creación servizos de información, orientación e acompañamento no eido xurídico, social e laboral e, de ser o caso, mediante a elaboración de itinerarios personalizados de inserción, creación de novas prazas de acollida temporal ou reforzo das existentes, a cobertura das súas necesidades básicas, ou xestión de clases de idiomas.

Estes programas ou accións poderán ser xestionados directamente polos concellos ou poden ser obxecto dunha xestión indirecta a través doutras entidades ou asociacións colaboradoras sen ánimo de lucro.