Notas de prensa

Galicia e Cuba asinan o primeiro protocolo de colaboración en cine

O intercambio de materiais audiovisuais entre o Centro Galego de Artes da Imaxe (CGAI) e o Instituto Cubano de Arte e Industria Cinematográficos (ICAIC), a realización de semanas de cine galego en Cuba e viceversa, nas que se proxectará material inédito, e a promoción de coproducións cinematográficas constitúen os tres aspectos más importantes do protocolo asinado na Habana por Fernando Salgado, presidente do Consorcio Audiovisual de Galicia, e Omar González, presidente do ICAIC.

Ao mesmo tempo, o Consorcio Galego comprometeuse a propor a incorporación de Cuba ao Fondo Raíces, no que se integran ademais de Galicia, Cataluña, Andalucía e Arxentina. Estas xestións completan as que se realizaron en Brasil recentemente.

Na rolda de prensa dada na Habana por Fernando Salgado e Omar González, á que asistiron unha trintena de medios cubanos e que tivo lugar no Centro Cultural “Fresa y Chocolate”, o presidente do Consorcio Audiovisual de Galicia ofreceu a comunidade galega como “porta de entrada do cine cubano en Europa”. “Este acordo establece unha ponte de celuloide que une ao noso país con Cuba”, concluíu Salgado.

Pola súa banda, Omar González asegurou que “Galicia y Cuba cuentan con lazos históricos visibles que pasan por la transferencia cultural y de nuestras costumbres”, ao tempo que indicou que “ a los gallegos les corresponde el protagonismo de España en Cuba porque aquí todos los españoles son gallegos”. “Galicia y Cuba compartimos un patrimonio que fluye a través de lazos que construyó nuestra historia”, incidió el presidente del ICAIC.

O acordo subscrito en Cuba engádese aos que xa se subscribiron con Arxentina e, recentemente, con Brasil, o que supón unha mostra máis de que Latinoamérica constitúe un mercado clave para o audiovisual galego.

Apoio á produción

No mesmo acto asinouse un acordo entre AGAPI e AEGA, por parte galega, coa produtora internacional do Instituto Cubano das Artes Cinematográficas. O acordo inclúe tres colaboracións importantes. Por unha banda, a posta en marcha dun proxecto para desenvolver un documental sobre o Cabaleiro de París, personaxe singular, nacido en Lugo en 1899 e que, na década dos anos 20, se desprazou a Cuba, onde se converteu nun símbolo polo seu carácter e forma de ver a vida. En segundo lugar, a iniciativa para a elaboración dun documental da pegada dos galegos en Cuba desde comezos do século XX. Como terceiro acordo, está o proxecto Cimarrón, que pretende levar ao terreo audiovisual a novela de Miguel Barnet, escritor cubano que conta a historia dos últimos escravos en Cuba.