Notas de prensa

O turismo galego, protagonista dos Premios Fitur

O Turismo galego foi o gran protagonista da Gala de entrega dos premios Fitur 2007 (Feira Internacional de Turismo de Madrid), ao ser o noso país o único destino que recibiu dous galardóns, en diferentes categorías. O director Xeral de Turismo da Consellería de Innovación e Industria, Rubén Lois González, recolleu o recoñecemento a Turgalicia como mellor stand por Comunidades Autónomas do Estado –premio compartido con Euskadi e Castela A Mancha– na pasada edición de Fitur, celebrada a finais de xaneiro no recinto feiral de Madrid, no que tamén se desenvolveu este mediodía o acto de entrega de premios.

O xurado quixo recoñecer no stand galego a calidade, elegancia e orixinalidade da montaxe expositiva, que serviu de referencia para outros stands de promoción turística do país, montados polo Goberno Galego en diferentes feiras e certames do resto do Estado e do ámbito internacional ao longo de 2007.

Mariscadoras de Cambados

As mariscadoras de Cambados agrupadas na asociación Guimatur recolleron o outro premio concedido ao Turismo galego nesta Gala. A súa presidenta, María Xosé Cacabelos, recibiu de mans de Teresa Caramé, directora Xeral de Turismo do Concello de Madrid, a Mención Especial do Xurado no apartado de Turismo Activo, pola súa iniciativa “Rotas turísticas por bancos marisqueiros”. Este produto, enmarcado dentro do chamado turismo mariñeiro e pesqueiro, está a ser apoiado pola Dirección Xeral de Turismo da Consellería de Innovación e Industria. Precisamente, a presentación deste novedoso proxecto turístico en Fitur 2007 tivo lugar no stand galego, tamén premiado.