Notas de prensa

O SLG presenta candidatura para o Consello Regulador do Ribeiro

O Sindicato Labrego Galego presentou en Ribadavia a súa candidatura para as eleccións ao Consello Regulador do Ribeiro. A lista do SLG vai encabezada por un vitivinicultor de Cenlle, Xurxo Álvarez Pérez, que será vocal do Consello; e a quen acompañan, como suplentes: Francisco Alonso Fernández, Felicita
Touza, Etelvino González e José Jaime Gil.

A candidatura do Sindicato Labrego vai ser a garantía de que, a partir do 1 de xullo, o Consello Regulador do Ribeiro defenda tamén os intereses de viticultores e viticultoras, así como os das pequenas adegas; e garantía, tamén, dunha aposta inequívoca pola calidade. Unha boa mostra disto é o programa de demandas que o Xurxo Álvarez defenderá, en nome do Sindicato Labrego, no seo do Consello Regulador do Ribeiro:

• Control estricto da uva e do viño no Ribeiro, incluíndo controis de campo en viñas.
• Seguimento e combate á publicidade enganosa nos puntos de venda.
• Profesionalización do Consello Regulador, coa inclusión da xerencia e asunción de competencias polo Pleno.
• Plan de promoción e comercialización dos viños do Ribeiro.
• Apoio Técnico ás adegas de colleiteiro.
• Apoio por parte do Consello Regulador á Mesa do Viño.
• Posta en marcha de iniciativas e axudas en favor da reconversión varietal no Ribeiro.
• Apoio ás medidas estructurais na explotación da terra (Rexistro Vitícola, Banco de Terras, concentracións parcelarias, etcétera).
• Separar o control de produción do control da elaboración, non optando nunca pola privatización.
• Separar o control da certificación, sendo exclusivamente o Instituto Galego de Calidade Alimentaria (INGACAL) quen emita as etiquetas.
• Debater co sector o orzamento e a estratexia de promoción.
• Elección do presidente ou presidenta: será democrática e terá preferencia a persoa que sexa do sector, aínda que non sexa vocal. O pleno tomará a decisión.
• Incluír nos consellos a unha persoa, con voz e sen voto, representando consumidores e consumidoras.
• Non permitir productos obtidos con organismos manipulados xeneticamente.
• Establecer e favorecer prácticas sustentábeis, limitando o emprego de químicos, creando un listado de produtos prohibidos, etcétera.
• Medidas de control nos mercados para garantir que non existen residuos no produto final.