Notas de prensa

Presentada a rodaxe de Os mortos van á presa

Logo dun ano de traballo, desde que o 27 de setembro de 2006 cancelárase a rodaxe da película “Os mortos van á présa”, Ángel de la Cruz anuncia a nova posta en marcha do proxecto e o inicio da rodaxe no Concello de Ribadeo o próximo 25 de febreiro, aínda que a preproducción comezará de feito tres meses antes, o 1 de decembro deste ano. “Foi un ano longo, triste e moi duro”, asegura De la Cruz —que estivo acompañado na rolda de prensa celebrada hoxe en Santiago, no Club Internacional de Prensa, polo Alcalde de Ribadeo, Fernando Suárez, o Director de Programación da TVG, Eduardo Galán e o produtor executivo Manuel Cristóbal—, “pero, como en moitas películas, terá un final feliz”.

“A miña intención sempre foi volver rodar no outono”, comenta o director do proxecto, “pero as datas botábansenos encima e algúns técnicos e actores xa adquiriran outros compromisos. Non tiña sentido rodar sen eles, senón buscar as datas máis adecuadas para volver reunir a toda a nosa xente”.

Tras a suspensión da rodaxe, o director e guionista Ángel de la Cruz, animado pola totalidade do equipo técnico e artístico do filme, máis de oitenta profesionais, vestiuse a chaqueta de produtor para, durante doce meses, buscar a viabilidade necesaria para salvar a longametraxe e levar a bo porto a produción. Logo de reescribir o guión para redimensionar o orzamento, deixándoo no máis axeitado de 2 millóns de euros —1.550.000 de custo de realización e o resto en copias e publicidade (un aforro dun millón de euros con respecto ao anterior)—, a empresa ARTEMÁTICA PRODUCIÓNS, cuxa titularidade ostenta o mesmo director, púxose a traballar para atopar canles de financiamento e socios adecuados que posibilitasen a realización da película partindo de cero, xa que non se vai a aproveitar nada do material rodado.

Co beneplácito do Concello de Ribadeo, que tamén colabora na película achegando servizos en especies, Buena Vista International, distribuidora multinacional filial da Disney, foi a primeira en sumarse ao proxecto, tras a cal entraron tamén Televisión Española e Televisión de Galicia —en calidade de produtor asociado—, a cuxos apoios hai que engadir a axuda da Xunta de Galicia (concedida en anos anteriores) e a do ICO-ICAA-Ministerio de Cultura que se xestionará a través da entidade Audiovisual SGR.

Así mesmo, coproducirán o filme as empresas PERRO VERDE FILMS —propiedade de Manuel Cristóbal, novo produtor executivo da longametraxe— e RESONANCIA POSTPRODUCCIÓN que se encargará precisamente dos traballos de postproducción da mesma.

Doutra banda, un grupo de investidores galegos alleos ao audiovisual, que desexan manter o anonimato, sensibilizados co director e o resto do equipo, participarán de diversas formas no financiamento do filme.

Ángel de la Cruz non descarta aínda que se sume algunha outra produtora ou entidade á produción, segundo as súas propias palabras, “para conseguir rodar na mellor das condicións e converter a «Os mortos van á présa» nun éxito sen precedentes do cine galego”. Sen dúbida, as 150 copias previstas por Buena Vista, o acordo de vendas internacionais coa empresa Six Sales e a coidada campaña de promoción do filme, cuxa estratexia xa está sendo deseñada, contribuirán a lograr estes obxectivos: “conseguir beneficios para que, por unha banda, a seguinte produción vaia un pouco máis á présa”, chancea De la Cruz, “e demostrar que tamén desde Galicia pódese facer un cine comercial con calidade. Con humildade pero sen renunciar a nada”.

“A miña máxima como produtor e director”, continúa Ángel de la Cruz, “é como a dos pequenos comerciantes: «o cliente sempre ten razón» e os nosos clientes son os espectadores. Cando a cota do cine español está nun 7,4 %, mentres que en Francia supera o 40 %, algo malo debemos estar a facer e deberiamos ser máis autocríticos co noso traballo”.

Ángel de la Cruz, que cos seus traballos anteriores ostenta o privilexio de ser ata a data o director galego de máis éxito da historia do país, só superado en producións galegas polos foráneos Amenábar, Cuerda, Fernando León e José Pozo, sinala que a intención das produtoras non é rodar unha película de autor nin un éxito custe o que custe, imitando por exemplo os éxitos perecedoiros das teleseries de moda. A intención é rodar unha película divertida, entretida e chea de sensibilidade, que non deixe indiferente a ninguén e permaneza no tempo.

“A mellor promoción para unha boa película é o boca a orella, pero normalmente non dá tempo a que se propague se nos primeiros días, o primeiro fin de semana sobre todo, alcanza escasa repercusión”, explica Manuel Cristóbal, produtor executivo. “Queremos que se fale da película desde moito antes da súa estrea e para iso estamos ultimando unha campaña de comunicación directa co público que incluirá, por exemplo, un concurso para participar como figuración no filme, convivindo co equipo de rodaxe, descargas e agasallos on-line, varias preestreas por toda España ou un exhaustivo diario de rodaxe no que poderá deixar o seu comentario quen desexe”. Todas estas novidades poderán ser seguidas desde a páxina web da película www.osmortos.com, (ou www.losmuertos.es) deseñada pola empresa OtiiPlanet coa axuda do Consorcio Audiovisual de Galicia, que se activará o próximo 2 de novembro, coincidindo coa festividade de Defuntos.

Tamén a prensa xogará un lugar destacado nos plans da produtora para dar a coñecer o seu produto. Ademais dunha área restrinxida na web, na que haberá que rexistrarse, con información e material gráfico para os profesionais do sector, ampliado cada semana, os medios de comunicación serán invitados a asistir, en visitas organizadas e graduadas, á rodaxe onde poderán vivir desde dentro a experiencia dunha produción cinematográfica. “Temos que lograr cambiar a imaxe do noso cine”, destaca o director, “e pensamos que, aínda que supoña un esforzo complementario importante, un bo método é que nos vexan as tripas e a continuación cónteno desde dentro”.

A película narra a chegada a unha pequena vila da costa galega dunha camioneira que, indo á procura de marisco, queda atascada nunha ponte impedindo o paso ao cemiterio o día que teñen que enterrar ao pai do patrón maior da confraría de mariscadores. Interpretada nos seus principais papeis por Neus Asensi, Chete Lera, Manuel Manquiña e un elenco de case trinta actores máis, o argumento foi definido polo director como “unha historia de percebes”, non só porque estes crustáceos teñan tamén o seu protagonismo na historia, senón porque algúns dos personaxes compórtanse como tales, “igual que moitos na vida real”, ironiza o director.

Que “Os mortos van á présa” consiga ver a luz será posible grazas ao empeño de moita xente, en primeiro lugar de todo o equipo técnico e artístico da película, do Excmo. Concello de Ribadeo, especialmente da xente de pobo de Rinlo, e tamén de numerosos profesionais, entidades, institucións e compañeiros do audiovisual galego que, por ser unha lista tan longa, sería imposible enumerar en tan pouco espazo. Pero “todos terán o seu lugar nos agradecementos dos créditos da película”, puntualiza De la Cruz.