Notas de prensa

O Cetmar acollerá a sede provisional da Agrupación Europea de Cooperación Territorial Galicia-Norte de Portugal

A Conselleira de Pesca e Asuntos Marítimos, Carmen Gallego Calvar, presidiu a reunión do Padroado da Fundación Cetmar, que se celebrou no Centro de Formación “A Aixola” de Marín. A esta xuntanza tamén asistiron a directora xeral de Innovación e Desenvolvemento Pesqueiro, Fátima Linares Cuerpo, e o director-xerente do Cetmar, Alberto González Garcés. Así mesmo, estiveron presentes como membros do Padroado, responsables das vicerreitorías de investigación das tres universidades galegas (Vigo, A Coruña e Santiago), das consellerías de Innovación e Industria, Medio Ambiente e Educación, así como representantes da Secretaría General del Mar e o Instituto Español de Oceanografía.

O desenvolvemento da xuntanza deu comezo, segundo constaba na orde do día, coa lectura da acta da sesión anterior, celebrada no mes de decembro, e que quedou aprobada co asentimento de todos os presentes. De seguida, o director do centro presentou o informe de xestión do Cetmar no que deu a coñecer as liñas de traballo que se seguiron no primeiro semestre do ano 2008 manteñen o obxectivo xeral de fomentar e executar accións tendentes á conservación e o aproveitamento responsable do medio mariño e dos seus recursos.

Alberto González Garcés destacou que o persoal do Centro Tecnolóxico do Mar continúa a traballar para dar seguimento ao labor de intermediación con institucións e centros de investigación, sector empresarial e Administración en traballos de investigación e desenvolvemento. Ademais, sinalou que o centro que dirixe busca avanzar cara a un carácter máis tecnolóxico a partires da futura unidade de tecnoloxías mariñas, pendente de implantación. Así mesmo, recordou algúns dos proxectos que deron os seus primeiros pasos nestes primeiros seis meses do ano e os que finalizaron neste mesmo período como Aquareg. En concreto, explicou aos membros do Padroado que neste tempo se manteñen activos un total de 60 proxectos e iniciáronse 19 novas iniciativas a través de contratos, convenios ou encomendas.

A continuación, os asistentes aprobaron as contas anuais da Fundación relativas ao exercicio 2007, que tamén foron expostas polo director-xerente do centro. As cifras, que deben ser aprobadas dentro dos seis meses seguintes á data na que se pecha o exercicio, indican que os resultados obtidos foron moi positivos o ano pasado, xa que se empregaron máis de sete millóns de euros para os proxectos que desenvolve o Centro Tecnolóxico do Mar.

Finalmente, os patronos aceptaron a solicitude que o Goberno galego lle fixo ao Cetmar para a cesión temporal dun espazo das súas instalacións para albergar a sede da Agrupación Europea de Cooperación Territorial (AECT) Galicia-Norte de Portugal. Deste xeito, e despois de que se asine un convenio de colaboración entre o Cetmar e a Secretaría Xeral de Relacións Exteriores da Xunta de Galicia, habilitarase unha zona para que se ubiquen nela as dependencias desta asociación durante un período de dous anos.

A Xunta de Galicia, en común acordo coa Comisión de Coordinación da Rexión Norte de Portugal, acordou constituír unha asociación europea de cooperación territorial que terá a súa sede en Vigo, co obxectivo de fomentar a colaboración entre Galicia e Norte de Portugal en todos os ámbitos posibles, especialmente, no eido mariño.