Notas de prensa

Acordada a creación do Observatorio da Competitividade de Galicia

O padroado da Fundación Galega para a Sociedade do Coñecemento (FSC) acordou constituír o Observatorio da Competitividade de Galicia como unidade de análise e proposta para o seguimento da situación e da evolución da comunidade neste ámbito. O máximo órgano de decisión da Fundación, que preside o titular do Goberno galego, Emilio Pérez Touriño, reuniuse en Santiago coa participación do conselleiro de Economia e Facenda, José Ramón Fernández Antonio; o vicepresidente da Fundación, Javier Riera Nieves; Honorato López Isla, conselleiro delegado de Unión Fenosa; Manuel Jove Capellán, presidente de Ineravante; Antonio Abril Abadín, secretario do consello de administración de Inditex; José María Barja Pérez, reitor da Universidade da Coruña; Alberto Gago Rodríguez, reitor da Universidade de Vigo; José Luis Méndez López, director xeral de Caixa Galicia; Álvaro Álvarez-Blázquez Fernández, director xeral do Igape; e o novo xerente da Fundación, José María Martín Moreno.

O Observatorio da Competitividade traballará estreitamente cos comités de área da FSC e con grupos de expertos cun enfoque de traballo en rede e búsqueda de sinerxias entre o sector empresarial, o investigador e o institucional. Entre os traballos que desenvolverá a nova unidade estarán a análise da competitividade de Galicia e dos seus clústers, os estudos comparativos con economías, mercados e clústers internacionais, e a definición e análise de escenarios e tendencias globais. Ademais, o Observatorio realizará un seguimento de indicadores de competitividade, e promoverá a difusión de modelos de cooperación entre clústers, así como o fomento e a difusión da cultura e os conceptos da competitividade.

O padroado analizou tamén as actividades desenvolvidas no primeiro semestre do ano pola Fundación, entre as que figura a posta en marcha da sociedade de investimento Crecentia Galicia, impulsada por Inveravante e as entidades financeiras galegas; o impulso do EnergyLab como Laboratorio de Eficiencia Enerxética; ou a consecución para Galicia do proxecto Whyville, plataforma tecnolóxica baseada na utilización de Internet no campo da educación de nenos e xoves; e o desenvolvemento do plan estratéxico da Agrupación de Empresas Innovadoras (AEI) de Enerxías Renovables e Medio Ambitente, que obtivo a calificación de excelente polo Ministerio de Industria.

A ferramenta da triple hélice galega

No seu papel promotor e impulsor de ideas e proxectos no ámbito da sociedade do coñecemento, a FSC xestionou a posta en marcha destas iniciativas que, xunto co novo Observatorio da Competitividade, abranguen os distintos ámbitos recollidos nos comités de área da Fundación: o de Innovación e Coñecemento, dirixido por Honorato López Isla; o de Novos Negocios e Emprendedores, Manuel Jove; o de Cooperación e Competitividade, liderado por Javier Riera; e o de Internacionalización, a cargo de Pierre Ianni.

O máximo organo reitor da Fundación tamén acordou a aprobación do orzamento para o presente exercicio e ratificou o nomeamento do novo xerente, Jose María Martín Moreno.

A Fundación Galega para a Sociedade do Coñecemento ten por obxecto o impulso, promoción e coordinación de actividades para a mellora da competitividade das empresas galegas e a súa internacionalización; a análise de novos proxectos de investimento; a extensión e implantación de novas tecnoloxías; o desenvolvemento da sociedade da información e o impulso das redes de coñecemento e cooperación. As empresas e institucións fundadoras son PSA Peugeot Citroën, Inditex, Unión Fenosa, Coren, Pescanova, e Finsa; as entidades financeiras Caixa Galicia, Caixanova, Banco Pastor; as universidades de Santiago, Vigo e A Coruña; e a Administración galega.