Notas de prensa

Feijóo, satisfeito pola liberación dos 36 tripulantes do Alakrana retidos no Índico

O presidente da Xunta, Alberto Núñez Feijóo, manifestou a “satisfacción de todo o pobo galego e do Goberno da Xunta pola liberación dos 36 tripulantes do Alakrana” e puxo a disposición das familias dos mariñeiros secuestrados toda a axuda e os recursos que precisen. “Despois de 47 días de secuestro, por fin conseguimos que toda a tripulación, sa e salva poida volver a España, e poida volver, neste caso, a Galicia”, afirmou o mandatario galego nunha comparecencia ante os medios de comunicación para valorar a “boa nova” da liberación dos tripulantes do pesqueiro.

Núñez Feijóo explicou que, minutos antes de que o presidente do Goberno español ratificase aos medios a nova, concretamente ás 14,25 minutos, a vicepresidenta primeira do Goberno lle confirmou “que o barco Alakrana con toda a tripulación, xa estaba navegando con ruta a Seychelles” e que, “desde as Seychelles, aproximadamente 40 horas de navegación, se producirá a repatriación a España vía aérea”. “Inmediatamente falei coa muller do patrón que me confirma que o seu marido falou con ela e que está navegando dentro do barco con toda a tripulación rumbo a Seychelles, polo tanto, con normalidade”, sinalou Feijóo ao respecto indicando que lle transmitiu tamén “o afecto persoal e a nosa satisfacción e o noso alivio por este desenlace que tanto desexabamos e que tanto tardou”.

A disposición das familias

Nesta liña, o presidente galego quixo trasladar tamén todo o afecto do pobo galego, da Xunta de Galicia “ás familias e aos mariñeiros” que, dixo, “estou seguro que hoxe senten unha enorme emoción compartida por todo o pobo galego” e amosouse confiado en que “o esperadísimo encontro” dos tripulantes cos seus achegados se produza “en breve, unha vez tocada terra en Seychelles e unha vez facilitado o regreso vía aérea a España”.

O titular da Xunta tamén recoñeceu “a enteireza e o comportamento exemplar das familias e da tripulación, do patrón e dos mariñeiros” e aseverou que, desde o primeiro día, “Galicia estará a disposición de todas as familias e de todos os mariñeiros para que superen, de forma definitiva, este lamentable episodio”.

A este respecto, Feijóo anunciou que, a través da conselleira do Mar e do conselleiro de Presidencia “se convocou xa o comité de seguimento entre as autoridades autonómicas e locais cun dobre obxectivo: facilitar todo aquilo que as familias precisen desde que cheguen a Galicia; e facilitar desde o primeiro día as axudas psicolóxicas e de todo tipo que precisen os mariñeiros para reintegrarse no menor tempo posible á súa vida normal”. Polo tanto, remarcou o presidente galego, “seguimos dando un total apoio aos mariñeiros, seguimos dando un total apoio ás familias e seguirémosllo dando unha vez que cheguen a Galicia e nas semanas posteriores ata a súa absoluta recuperación e volta á normalidade”.

Traballar para que non se produzan novos apresamentos

Por último, o xefe do Executivo autonómico manifestou a súa vontade de traballar, “desde mañá” mesmo para tentar que non se volvan producir apresamentos ilegais como o do Alakrana noutros pesqueiros galegos e españois que faenan en augas do Índico.

“Ese será o labor que debemos empezar a partir de mañá”, insistiu lembrando, non obstante, que “hoxe é un día de celebración, de felicitación, o día de respecto máximo ás familias, aos mariñeiros, e o día de dicir que, por fin, despois de 47 días, 36 tripulantes do Alakrana están navegando cun rumbo que os traerá a casa, cun rumbo que os traerá a Galicia, que os traerá a España. Ese era o obxectivo que por fin, 47 días despois, se consigue”, concluíu.