Opinión en Galicia

Se a imaxe vale máis que mil palabras, ¿por que algúns medios maquillan a palabra pero non a imaxe?.

Os medios gráficos, televisións ou xornais, amosan as imaxes máis crudas nos sucesos luctuosos, e un cadaver sen cubrir no medio da estrada, ou un regueiro de sangue na beirarrúa, teñen garantido lugar de honra á hora de contarnos a cruda realidade, impactando en roxo e morte nas nosas pupilas.

Non pasa o mesmo coa palabra… Cando hai uns días os etarras asasinaron a Isaias Carrasco, nunha avanzada informativa de Radio Nacional, escoito que a filla que presenciou a súa morte, nun comunicado lido coa maior enteireza chamoulles ós terroristas “hijos de puta”, na máis directa denominación dun desalmado aínda que analisada a frase non responda ó significado. A ninguén pode extrañar unha expresión así como mínimo desafogo.

Pois nos informativos posteriores eliminouse a frase cun empalme de son ostensiblemente burdo. O mesmo ocorriu con algunhas televisións. Coñecendo o contido, sabía a vergoña aquela poda inmunda.

Noutra televisión escoito á rapaza dicir que os terroristas “no tienen cojones”. Quedei abraiado por esa outra “maquillaxe” informativa sen dúbida para non ofender ós benpensantes e benfalantes, cando o que verdadeiramente nos ofende é a morte alevosa; o terror.

En fin, que para coñecer a declaración íntegra da rapaza tiven que ler ó día seguinte La Voz, que a publicaba na segunda páxina.