Opinión en Galicia

Se algo lle pertence a un político é a opinión manifestada coa palabra; a idea plasmada na expresión verbal que se formula con liberdade no lugar chamado a ser pronunciada.

Un deputado en Cortes falará no Parlamento, un ministro no Consello, un deputado provincial na correspondente corporación, e un concelleiro, sexa do goberno ou da oposición, no salón de plenos da Casa do Concello.

Do poder que emana da figura do alcalde, na súa arte ou ciencia para gobernar os usos da palabra, na súa man esquerda en tratar ó colectivo, radica o éxito do traballo municipal.

En Vigo vaise poñer en práctica un novo sistema, que nos medios informativos ven funcionando, pero que nun concello terá que ser comprobado. Os concelleiros poderán falar un máximo de dez minutos na primeira intervención, cinco para o turno de réplica, e tres para pechar o tema, e cando o tempo remate o micrófono do seu escaño deixará de funcionar.

O equipo gobernante, dupla política de consenso, está de acordo no tratamento; a oposición, considera dictatorial a medida. O último pleno durou nove horas, deste xeito agardase gañar en axilidade.

Se se prepara axeitadamente un tema, dez minutos dan para moito e un bo orador pode arrebatar coa súa palabra. Claro que bos oradores, oradores en fin, hai moi poucos en política, entre outras cousas porque o sistema non se presta.

Velaquí a política por minutos. Logo pode vir a política a distancia, por intermediación, ou virtual.

A medida pode acortar a duración dos plenos. Pero só eso. Non os vai mellorar.