Congresos e eleccións

Andan os políticos revoltos e, tomándoos como referencia, revoltos andamos todos.

Vivimos tempos de intranquilidade no económico e no social, e en lugar de ser os políticos os que nos marquen xeitos de convivencia e lineas de actuación, resulta que os factores económicos e sociais poñen intranquilos a gobernantes e opositores, co que o clima social está enrarecido sen trazas de que vaia mellorar a curto prazo.

As recentes eleccións xerais, aínda que relativamente equilibradas, viñeron clarificar perfectamente a situación. Un partido gobernará en solitario durante catro anos, e outro partido deberá durante o mesmo período efectuar unha nova “travesía do deserto”.

O PSOE non ten problemas porque goberna en España e en Galicia. O PP perdeu o goberno en Galicia e non o consegueu en España. Ergo, o PSOE está tranquilo a curto prazo mentras o PP a falta de resolver problemas xerais ten que atender os que se lle acumulan de réxime interno.

Os dous grandes partidos en Galicia e a escala xeral do Estado, teñen pendientes cadanseu congreso, que se o do Partido Popular ten que servir para serenar os ánimos e tranquilizar a todos os militantes e simpatizantes, o PSOE ten tamén unha cita pendiente e, polo que se refire a Galicia, esta servirá para consolidar unha estructura que sintonice coa cúpula do Partido neste País.

Os Congresos son ocasións propicias para que os partidos políticos estabilicen organizacións e ánimos, polo que os próximos meses serán decisivos para os dous grandes partidos e para todos nós.

E logo está o Bng que goberna conxuntamente co PSOE en Galicia, con problemas de relación e de competencias, pero todo sometido á gran premisa de manter a gobernabilidade de Galicia.

Para o PSOE o ideal sería gobernar Galicia en solitario despois das próximas eleccións para as que faltan pouco máis de nove meses. E non debera extrañar que no próximo Congreso se aborde do xeito que sexa esa posibilidade que marcaría un futuro perfecto para a organización. Pero os futuros perfectos poucas veces se dan na realidade.

O certo é que todos andamos metidos na fariña dos Congresos e das eleccións, sexa por activa ou por pasiva. Todo se cocerá dentro das organizacións partidarias, pero a nós quédanos algo máis que ser espectadores pasivos do que vai pasar.

O tema dos congresos é exclusivo das organizacións políticas. Pero hai unhas eleccións, e aí si que todos temos algo que ver.

Os Congresos organizaranse internamente, pero xa poden ir preparándose para convencernos a todos de que todo vai ben, pero especialmente que todo pode ir mellor, que todo vai ir mellor. Porque nas eleccións decidimos todos.