Opinión en Galicia

Que as dúas grandes caixas de Galicia vaian xuntarse é algo que parece reconfortarnos a todos, porque deste xeito vaise formar unha entidade poderosa e activa que teña importante papel na economía do país e soporte mellor os avatares dun tempo económicamente difícil.
Que esta operación ten consigo custos importantes, tamén é asumido por todos, sabendo que vai supoñer a minoración do número de persoas que traballan nas entidades, o peche de moitas oficinas, pero tamén a percepción dos beneficios previstos pola Administración para este tipo de operacións de interese estratéxico para o país.
Pero o que non se entende é que as dúas entidades pretendan abandoar o accionado de Reganosa, unha empresa galega, de interese estratéxico no sector das enerxías, e que pode supoñer unha importante dinamización no occidente de Galicia e no sector enerxético. O goberno galego pide que a empresa pase a outra entidade galega o dereito de tanteo para poder entrar no accionariado, e o Psdeg ven de dirixirse ós directores xerais de ámbalas dúas entidades anunciándolles a súa oposición á retirada das caixas galegas do accionariado, pedindo que reconsideren esta decisión.
Ben farán as caixas en reconsideralo porque retirarse dunha empresa xenuinamente galega para facer caixa e afrontar comodamente outras accións ou atender outros sectores será moi difícil de comprender polos galegos, que saben que non poden agardar miragres nas decisións de alto nivel económico, pero saben moi ben que se as primeiras entidades de aforro do país non invisten en Galicia moi poucos poderán facelo, e constitúe deixación de funcións ou invitación a forzas foráneas a que se fagan máis fortes na nosa terra.