5.000 é o límite

A Unión Europea ten establecido en 5.000 o número dos habitantes dunha comunidade municipal para poder ser viable política, técnica e financeiramente. E en base a esa cifra fai todo tipo de cálculos e planificacións para o futuro.
Cando falamos de Europa seguimos considerándonos fóra e falamos desta unidade como algo que aínda está por riba de nós, fóra de nós; como se Europa seguise empezando nos Pirineos. E polo que a Galicia se refire, nalgúns aspectos así parece ser, porque as homologacións van lentas, condicionadas sempre polas nosas especiais circunstancias.
O da poboación dos nosos concellos é unha delas porque na actualidade dos 315 concellos galegos, so 115 superan esa cifra mínima de habitantes, e 200 están por debaixo dos 5.000 poboadores, e a cifra dos que non chegan ó límite non deixará de aumentar nos próximos anos.
A Federación de Concellos, a Xunta de Galicia e os mesmos concellos afectados non deixan de estudiar o tema, pero vai ser difícil plantealo e máis aínda conseguir fusións ou asociacións de concellos para facelos viables a un prazo medio.
A tendencia ata non hai moitos anos era disgregar entidades que polas circunstancias máis diversas conseguían un nivel de poboación que lles permitía unha vida independente, diante da natural tendencia a independizarse para posuir no lugar de residencia capacidade de decisión e afianzamento da personalidade do pobo. Pero esta tendencia chegou ó seu final e agora hai que implantala á inversa, coas dificultades inherentes o caso.
Xoga a favor a facilidade das comunicacións, os beneficios de mancomunar servicios, o exemplo das concentracións en centros educativos, os servicios médicos ou farmacéuticos. En contra só xogan os prexuicios e os afáns localistas que, polo de agora, son moito máis poderosos ca as vantaxes.
Terá que pasar tempo para que nos vaiamos convencendo, e os longos tentáculos de Europa vaian eliminando barreiras e facilitando accións, pero teñamos en conta esa cifra dos 5.000 como punto de referencia para facer viable un concello. O tempo, que case todo o vai conseguindo, logrará o que polo de agora só é un imposible necesario. A decisión da Xunta de conceder maiores axudas ós concellos que se asocien pode ser un bo camiño.