Recuperación

Son tantas as perdas que está sufrindo o tecido productivo de Galicia, que o que cabe preguntarse é se seremos capaces de recuperarnos desta caída en picado, desta desaparición paulatina e acelerada de empresas e postos de traballo.

O que levou tantos anos conseguir, froito do traballo calado de tanta xente durante tanto tempo; de tantos esforzos individuais e colectivos vai
caendo, día a día, nas mans de ninguén, sometidas pequenas e medianas empresas a concursos de acreedores, subastándose os bens das pequenas sociedades, pechando centros de traballo e deixando na rúa aos que neles gañaban o seu sustento.

Nalgún momento terá que cambiar o signo da economía, pero parece como se os gobernantes fiaran todo á Divina Providencia e non a medidas socioeconómicas que deberan ter entrado en vigor hai moito tempo para conseguir ilusión e claridade.

Nun tempo no que nada se move xa, no que o encefalograma sociolaboral debe estar a cero, quédanos a dúbida de se a situación que se pretendía buscar é esta, tabula rasa, para logo empezar de cero. Pero, na actual situación, ¿Empezar, quen?. Recuperar, ¿qué?. E, sobre todo, para cando.